АРДАКТУУ ЭНЕРГЕТИК
10 Март 2025 ж.
Энергетикага 35 жылын арнаган ардактуу энергетик Бекболот Субанов.
Ал, 1965-жылы 4-октябрда Алай районунун Мурдаш айылында жарык дүйнөгө келген. 1982-жылы Мурдаш орто мектебин аяктаган соң, Жалал-Абад облусундагы ЗООВЕТ техникумуна тапшырып 1988-жылы бүтүргөн. 1988-жылы Алай районундагы Алай үлүштүк ишканасына энергетик болуп жумушка орношуп, ал жерде 3 жыл эмгектенген.
Каарманыбыз 1991-жылдын 5-мартынан тарта Алай РЭТинде эмгектенип келет. РЭТтеги алгачкы жумушу “Гүлчө” көмөк чордонунда кезметтеги электр куроочу болгон. 1992-жылы Ыкчам диспетчердик кызматына которулган. 2001-жылдан тарта Ыкчам диспетчердик кызматтын башкы диспетчери болуп иштеп келет.
Диспетчердин негизги милдети авариялык өчүүнү ттезинен жоюп, абоненттерге үзгүлтүксүз жарык берүү болуп саналат, -дейт Бекболот Субанов. Өзүнөн кийинки муундагы бир топ диспетчерлерди тарбиялап, үйрөтүп, кеп кеңешин берип келүүдө.
Энергетика тармагында мурункуга салыштырмалуу, азыр бир топ ыңгайлуу шарттар түзулгөнүн айтат. Акыркы жылдары энергетиктерге мүмкүнчүлүктөр кеңейип, РЭТтин анын ичинде ыкчам диспетчердик каананын жылытуу системасы ишке киргизилген.
Ошондой эле, 2024-жылы КР Энергетика министри Т.Ибраевдин тапшырмасы менен Алай элинин көп жылдан тарта кайрылып келе жаткан орчундуу маселеси, Бүлөлү көмөк чордонунун курулгандыгы дагы энергетиктерге эле эмес, эл үчүн да түзүлгөн зор шарт экенин, башкы диспетчер баса белгилейт.
35 жылдык эмгек жолунда бир да жолу өкүнбөгөнүн айткан энергетик мырзанын, жаш кезинен кыялданып, эңсеген кесиби. Кезинде айлык акы албай иштеген күндөрдө дагы бул жумушун чанып кетпеген каарманыбыз, жаш энергетиктерди патриот болууга чакырат.
