ЭНЕРГЕТИКАДАГЫ АЙЫМДАР
25 Февраль 2025 ж.
Бактыбаева Арзыкан Акпаралиевна 1968-жылы 12-июнда Ноокат районунун Кыргыз-Ата айыл аймагынын Борко айылында жарык дүйнөгө келген.
Ал Фрунзе Политехникалык институтунун энергетика факультетин 1992-жылы аяктаган.
1994-жылдан тарта Ноокат РЭТинде эмгектенип келет. Алгач жумушка киргенде электр куроочу болуп эмгек жолун баштаган. Бухгалтерия бөлүмүндө кассир жана калкты тейлөө борборунда оператор болуп иштеген. Азыркы тапта “Теңдөө жана техникалык жоготууларды эсептөө инженери” болуп иш алып барат.
Аткарган жумушу өзүнө жагаарын айткан каарманыбыздын негизги милдети, электр тармактарындагы күн сайын алынуучу суткалык кВты эсептеп, жыйынтыктап турат. Аба чубалгыларындагы реконструкция иштери жүргүзүлүп, өзгөрүү кирген учурларда схемага түшүрөт. Ар бир айдын соңунда техникалык жоготуулар блюнча эсептеп чыгат жана жыйынтыгын Кыргыз энергетикалык эсеп борборуна жиберет.
Арзыкан айым окуу жайда окуп жүргөн кезде 1-курстагы алгачкы практикасын Ноокат РЭТинде өтөп, андаң соң иштеп калган. Ошол кезден тарта башка тармакка кетпегендигин, кызыкпагандыгын айтат.
Жумуштан тышкары, ар бир кыргыз айымына таандык болгон кол өнөрчүлүк менен алектенип, түрдүү кемселдерди, моюн орогучтарды жибек жиптен токуйт жана сайма саят. Үй-бүлөлүү, жолдошу менен 2 уул, 2 кызды тарбиялап өстүргөн, учурда 8 неберенин бактылуу чоң эне, тай энеси.
