Ош электр тармактары ишканасында коррупцияга каршы күрөшүү жана анын алдын алуу боюнча түшүндүрүү жыйыны өткөрүлдү
20 Август 2026 ж.
Жыйын Кыргыз Республикасынын коррупцияга каршы мамлекеттик стратегиясын 2025–2030-жылдар аралыгында ишке ашыруу, ошондой эле 2026–2030-жылдарга карата мамлекеттик антикоррупциялык саясаттын максаттарын жүзөгө ашыруу алкагында уюштурулду.
Жыйындын жүрүшүндө “КУЭТ” ААКнын филиалы - Ош электр тармактары ишканасында коррупцияга каршы күрөшүү боюнча жүргүзүлүп жаткан иштер, кызматкерлердин кызматтык милдеттерин ак ниет аткаруусу жана кызматтык абалдан жеке кызыкчылык үчүн пайдаланууга жол бербөө маселелери талкууланды.
Ошондой эле ишканада коррупцияга каршы аракеттенүү боюнча түзүлгөн комиссиянын иши күчөтүлүп, анын курамына жетекчилик жана тиешелүү бөлүмдөрдүн өкүлдөрү киргизилгендиги белгиленди. Комиссия тарабынан эмгек жамааты менен үзгүлтүксүз түшүндүрүү иштерин жүргүзүү, мыйзам талаптарын жеткирүү жана эмгек тартибин чыңдоого багытталган иш-чараларды уюштуруу милдеттери коюлду.
Мындан тышкары, коррупциянын алдын алуу жана ага каршы күрөшүү багытында жүргүзүлүп жаткан иштер тууралуу маалыматтарды жалпыга маалымдоо каражаттарында жана социалдык тармактарда үзгүлтүксүз чагылдыруу да каралды.
Жыйындын катышуучуларына коррупциялык көрүнүштөргө эч кандай жол берилбестиги, кызматтык милдеттерди кыянаттык менен пайдалануу мыйзам чегинде жоопкерчиликке алып келери эскертилди. Ар бир кызматкер өзүнүн ишине жоопкерчилик менен мамиле кылып, мекеменин аброюн таза жана ак ниет эмгеги менен сактоого чакырылды.
Коррупцияга каршы күрөш - жалпыбыздын милдетибиз. Таза эмгек, жоопкерчилик жана ак ниет кызмат аркылуу гана күчтүү жана ишенимдүү энергетика тармагын түзө алабыз!
