Оштогу темир бетон буюмдарын жасоочу цехтен 18 күндө 252 даана мамыча чыгарылды

18 Сентябрь 2025 ж.

Энергетика министрлигинин тармакты өнүктүрүүгө багытталган долбоорлорунун алкагында Ошто “Темир бетон буюмдарын жасоочу цехи" курулуп, 31-августта ачылышы орун алган. 18 күндүн ичинде өндүрүштүк цех тарабынан жалпы 252 даана электр мамычалары чыгарылды. Бул жерден чыгарылган мамычалар электр тармактарынын ремонттук иштерине колдонулат.

Азыркы тапта жумуш кызуу жүрүп жаткан кези, күнүнө СВ түрүндөгү 12 даанадан электр мамычалары чыгарылат. Электр тирөөчтөрүнөн тышкары фундаменттик блоктор (ФБС), колодец шакекчелери, траверстер жасалып жатат. Цехте жалпы 12 кызматкер эмгектенет.

Цех заманбап бетон аралаштыргычтар, вибропресстер, буулоо камералары жана оор буюмдарды ташуу үчүн кран жабдуулары менен жабдылган.

Өндүрүштүн артыкчылыктары:

* Сатып алуу чыгымдарын азайтуу: өз өндүрүштү уюштуруу менен темир-бетон буюмдарын сатып алууга кеткен чыгымдарды кыскартуу мүмкүнчүлүгү түзүлөт;

* Жумуш орундарын түзүү: цехтин ишке кириши менен жергиликтүү калк үчүн жаңы жумуш орундарын түзүүгө шарт түзүлөт;

* Жогорку өндүрүштүүлүк: буюмдарды массалык түрдө чыгаруу аркылуу курулуш долбоорлорунун талаптарын ыкчам канааттандырууга болот;

* Продукциянын сапаты: технологиялык процесстерди сактоо жана бардык этаптарда көзөмөл жүргүзүү буюмдардын ишенимдүүлүгүн камсыздайт;

* Өндүрүштүн ийкемдүүлүгү: ар кандай типтеги темир-бетон буюмдарын жеке буюрмалар боюнча чыгарууга мүмкүнчүлүк берет.

Белгилей кетсек, Кыргыз Республикасынын Энергетика министрлигинин колдоосу жана “КУЭТ” ААКнын каржылоосу менен Ош электр тармактары ишканасынын базасында алгачкы жолу “Темир-бетон буюмдарын жасоо цехи” курулуп, 31-август Эгемендүүлүк күнүнө карата энергетика министри Таалайбек Ибраевдин катышуусунда өндүрүштүк цехтин ачылышы орун алган.